lunes, 30 de mayo de 2016

CONTOS XEOLOCALIZADOS

Durante o primeiro trimestre e boa parte deste curso estivemos traballando o texto literario, o conto, seguindo a estrutura de planificación de Myriam Nemirovsky. Levamos a cabo unha secuencia didáctica completa onde se traballaron tanto as propiedades do texto como do sistema de escritura.

Para crear uns produtos finais de calidade seguimos o proceso de creación literaria que propón Cassany e que leva consigo varias fases: xerar ideas, organizalas, elaborar borradores e mellorar eses borradores (revisar primeiro fondo e despois forma)
Enlace da diapositiva: http://slideplayer.es/slide/3063937/ 

O resultado final foron cinco álbumes ilustrados que limos ante as familias o Día do Libro.


Na biblio do centro temos unha proposta de proxecto chamada "COÑECENDO OUTES" pola cal imos, pouco a pouco, descubrindo as peculiaridades da contorna máis próxima. As historias que os nenos e nenas inventaron están baseadas en lugares de Outes, por iso, elaboramos entre todos este mapa feito con My Maps onde se localizan de forma sinxela. Se picades nos globos podedes ler os contos e ver os lugares. Os fondos dos libros son fotos reais que mandaron as familias ás que lles agradezo enormemente a súa implicación.



Todo este traballo forma parte do Seminario do que formei parte e que ten por título "Novas metodoloxías en Infantil e Primaria" que vimos de rematar . Levo aprendido moitísimo grazas a unhas compañeiras e compañeiros estupendos que saben un montón de textos e o comparten e que ademais, se mostran motivados na súa profesión, que xa non é pouco nestes tempos que corren! Mil grazas para eles!

Desta tarefa xurdiron outras relacionadas co texto informativo (noticias e entrevistas) e a biografía pois visitounos unha escritora de contos portuguesa afincada na zona, pero isto... ensínovolo noutra entrada!

jueves, 5 de mayo de 2016

OUTIENSES: PEPA NIETO. ARTE E MATEMÁTICAS.

Aquí vos deixo, por se alguén lle pode interesar, a nosa tarefa de recreación da obra de Pepa Nieto unha outiense de renome afincada en Madrid que destaca pola súa obra escultórica e como poetisa.
Primeiro limos a súa biografía, despois fixemos o seu retrato a partir da foto. Seguidamene observamos e  debatimos o significado da súa obra e, para rematar, fixemos as nosas propias esculturas utilizando figuras xeométricas como ela.
No seguinte dossier podedes atopar o resultado final e tamén a relación de estándares que se traballan nesta actividade así como as súas correspondetes rúbricas de avaliación.
Seguimos coñecendo Outes!
En breve, trípticos informativos e análise de gráficos poboacionais. ;)

lunes, 11 de abril de 2016

APRENDENDO POR COMPENTENCIAS: MENÚ SAUDABLE

Desta volta tivemos que elaborar un menú saudable. Para elo primeiro fixemos unha serie de actividades:
- Analizar os cadros nutricionais de diferentes envoltorios de alimentos.
- Facer murais dos nutrientes. Somos cinco grupos de catro persoas (so un deles ten cinco xa que somos 21). Primeiro decidimos o que iamos poñer nos carteis e para iso formulamos preguntas, despois buscamos a información nos libros (incluido o de texto) e a través de Internet e elaboramos e pasamos ao ordenador un documento onde se daba a resposta ás nosas preguntas. Por último, pegamos nunha cartolina tamaño A3 as nosas pesquisas e ilustrámolo coas fotos de comidas máis reprensentativas de cada un dos nutrientes que sacamos dos folletos dos supermercados.
- Unha vez aprendimos toda esta información elaboramos, cada grupo, o menú para un día da semana (uns luns, outros martes...) Así xurdiu un menú semanal que fomos desmenuzando a base de preguntas e de propostas. Dímonos conta de que faltaban alimentos e non era moi saudable así que reformulamos os nosos menús diarios ata dar cun menú final que será entregado ao encargado do comedor do colexio para que o valore.
Este documento que vos presento aquí é o resultado do traballo que vai ser enviado ás familias. Nel tamén aparecen os estándares de aprendizaxe traballados e unha tradución dalgunhas rúbricas do CEDEC.
Cabe destacar unha vez máis que na miña clase hai varios nenos e nenas con NEE e que cada un aprende na medida das súas posibilidades. Por poñer un exemplo, cando se pregunta que tres cousas aprendiches que non sabías, un dos nenos que ten unha ACS dixo que el aprendera a facer un menú, outro que aprendera nomes de alimentos e outro, sen ACS, en que alimentos había proteínas. Con esto quero exemplificar de que maneira cada neno ou nena aprende segundo os seus coñecementos previos andamiando o novo co que xa posuía de antes (Bruner).
Na miña opinión, e na de moitos pedagogos moitas veces olvidados, querer controlar o que o alumnado aprende é como poñer cancelas ao pensamento. Eles non aprenden o que ti lles ensinas, eles aprenden o que lles resulta significativo e iso é algo que ten que ver coas súas vivencias e ao que é imposible de chegar. Acaso se dúas persoas adultas len un mesmo texto non sacan conclusións distintas? E das mesmas conversas cada un non conta o conto como se ve reflexado nel? Aí o deixo para reflexión! ;)

lunes, 14 de marzo de 2016

FACEMOS ZOOM SOBRE OUTES: Proxecto de investigación.

Este ano o proxecto da biblioteca vai sobre Outes, o noso concello, por iso decidimos que queriamos situalo no mapa. A profe propuxo que fixéramos un traballo que seguira o esquema do libro de Itsvan Banyai, "ZOOM". Neste libro ilustrado o autor vai aumentando o foco de visión. Todo comeza coa cresta duna galo, que está nunha granxa, que está nun cartel, que está... (non vos vou desvelar o final!).
Grazas á axuda da profe de PROA, da de PT e da chica de prácticas fixemos o noso propio zoom sobre Outes. Por grupos e en diversos espazos: uns na biblio, outros facendo entrevistas, outros na clase... investigamos en libros, trípticos, Internet e buscando no dicionario.
Aquí vos deixamos o produto final e unhas fotos da exposición. Este mesmo dossier vano levar os nenos e nenas ás súas casas. Nel aparecen os estándares traballados, o resultado da investigación e as fontes consultadas. Tratamos tamén de elaborar a información e resumila.
Cada grupo adicouse a unha parte, algunhas están escritas en maiúsculas porque é no grupo que está o neno con NEAE e utilizamos con el esta tipografía.
No final do dossier podedes ver unhas rúbricas de avaliación traducidas ao galego e que aparecen no artigo do CEDEC "15 documentos imprescindibles para alumnos que trabajan por proyectos"
As impresións sobre este traballo son moi boas! Ata o de agora vexo que etaba máis adicada a traballar por centros de interés... Agora creo que vou entendendo o que é un traballo riguroso de investigación.
Dicirvos, finalmente,  que esta so é unha tarefa dentro do proxecto, tamén imos investigar sobre lugares que visitar en Outes e coa información elaborar un tríptico informativo, estamos facendo entrevistas a persoas da zona e elaborando biografías... Xa volo ensinaremos noutras entradas!





jueves, 21 de enero de 2016

TIPOLOXÍA TEXTUAL: OS CARTEIS

Na primeira avaliación estivemos traballando cos carteis. Comezamos mandando unha nota ás casas para que os nenos e nenas trouxeran carteis reais e colgámolos nun dos corchos para que quedaran ben visibles. As notas sempre as escribimos nós.


Puxémonos en grupos e fomos respontando a preguntas facilitadoras para deducir e observar como se fan os carteis e que características teñen: 

  1. Que tipo de letra se soe usar nos carteis?  
  1. Como soe ser esa letra? Escribe tres adxectivos sobre a letra dos carteis.
  1. Que utilizan os deseñadores dos carteis para chamar a nosa atención?
  1. Busca nos carteis cinco nomes propios e tres comúns.
  1. Cal é a norma de ortografía dos nomes propios?


Algunhas destas preguntas están relacionadas co formato e outras coa forma, tamén había preguntas nas que tiñan que localizar datos ou realizar cálculos matemáticos, para outras necesitaban buscar no dicionario e incluso buscar en Internet información, por exemplo: 

  1. Cal é o produto máis barato as cebolas ou as mazás? Por que o sabes?
  1. Se a miña nai sae ás 21:00 horas, pode levarme a ver o teatro? Razoa a túa resposta.
  2. Que significa a palabra “tributo”?
  3. A que festa podes ir en bus o día 12 de Outubro? 
  4. Investiga porque é festivo ese día.
Unha vez feito isto, entre todos e coa axuda da profe fomos facendo un documento sobre as principais características dos carteis que imprimimos e plastificamos para usar en posteriores ocasións.

Como non, o seguinte paso foi facer os nosos propios carteis, aquí xurdiu un pequeno debate de se eran carteis o que íamos facer ou murais, chegamos á conclusión de que eran murais porque non tiñan nin hora nin lugar onde se celebraba a actividade (noutro post comparto a nosa proposta de murais). A temática destes murais foi as normas da clase, unha vez máis puxémonos en grupos, eleximos unha norma da clase que xa fixeramos entre todos e todas e dispuxémonos a convertila nun mural para expoñelo no corcho. Estivo moi ben porque todo o alumnado trouxo ao día seguinte as imaxes e os materiais cos que se comprometeu, nunguén se olvidou dos 21! Está claro que cando se implica aos rapaces na súa aprendizaxe suceden cousas incribles como esta. Así de ben quedaron.




Para facer uns verdadeiros carteis propúxenlles facelos no ordenador, ademais para ser a aprendizaxe máis significativa as súas creacións ían ter unha función social que era avisar aos usuarios da biblioteca das actividades que se desenvolven nos recreos. Aprenderon e practicaron un montón de cousas sobre edición en procesadores de texto. Este foi o resultado.


Gustariame destacar chegados a este punto que dentro da miña aula traballamos varios profes xuntos. Conto con horas de apoio de profesorado con dispoñibilidade horaria. A profe de PT está regularmente tamén dentro. Organizar isto non é fácil... Non o vou negar, fáltanme coñecer referencias e experiencias onde este sistema se leve a cabo e non se limite a que "ti séntaste con este que vai mal". Fáltanme experiencias por desgraza... pero como son moi terca e creo profundamente  na inclusión educativa, mirei, preguntei e investiguei onde puiden.

Grazas aos sabios consellos dunha compañeira do seminario que estou cursando decidín facer rincóns rotatorios como en infantil. O profe de primaria estaba no ordenador, a profe de PT axudando aos nenos e nenas con NEAE e eu correxindo os murais cunha rúbrica na que se avaliaba se as letras do texto eran máis grandes e chamativas, se o cartel era creativo, se se trouxera o material, se se revisara a ortografía, se tiña imaxes... Cada un adicado a unha tarefa e eu con tempo para avaliar e reflexionar con eles sobre os seus traballos.

Non sei se pode ser interesante pero vou poñer aquí algúns rincóns que levo feito a nivel de 3º de primaria para poder realizar estas actividades de corrección de forma máis personalizada ou, sinxelamente, para que aprendan doutra maneira máis aló dos libros de texto :

- Rincón do supermercado. Compramos e vendemos coa axuda dos folletos publicitarios, traballamos cos cartos e todo o que esto implica: Sumas, restas (dar cambios), decimais... 


- Rincón das multiplicacións. Entendemos a mecánica da multiplicación con contas de cores e agrupando de tres en tres, de cinco en cinco... Logo comprobamos que a nosa predicción é a correcta.


- Rincón do ordenador. Aprendemos a usar o editor de textos: cambiar o tamaño e a cor das letras, negriña, suliñado, copiar e pegar unha imaxe...


- Rincón das fraccións. Eles aínda non o sabían pero estaban manipulando o material co que ían traballar as fraccións, Eu dinlles as pezas e saíron cousas realmente creativas.


- Rincón das marionetas. Inventamos historias. 

- Dominó de restas. 

- Sumas e restas coa técnica do folio xiratorio e comprobando resultados coa calculadora. 

- Rincón do dicionario. Lemos o conto coa técnica das lecturas compartidas e buscamos as palabras que non entendemos.


Aprender e facer as cousas doutra forma é posible en primaria! ;)

Recordo que na miña aula hai varios nenos e nenas con NEAE e NEE, tamén os hai rubios, morenos, delgados, faladores, tímidos, con gafas... 


miércoles, 13 de enero de 2016

ESQUEMA ALFIN: APRENDENDO A APRENDER.

Como xa vos podedes dar conta polas publicacións este ano estou metida de cheo no traballo da biblioteca escolar e estou aprendendo un montón de cousas que tamén me veñen moi ben para a miña aula de primaria.
Antes de Nadal estiven facendo unhas xornadas de formación de usuarios polas que pasou todo o cole, dende os máis pequeniños que coñeceron a mascota, as normas e o lugar e onde estaban colocados os libros, ata os máis maiores con trucos para buscar información tanto dentro da biblio como na web, coñecer as partes dos libros, distinguir os científicos dos de literatura, os diferentes xéneros... Se queredes ver un esquema do que consistiu este traballo podedes picar no seguinte ENLACE. 

Preténdese así que a biblioteca se convirta en centro de recursos para todo o profesorado e alumnado, e por suposto, tamén en lugar de consulta, ocio e lecer. A biblioteca é, o que da en chamarse nos últimos tempos, o lugar do que parte a ALFABETIZACIÓN MEDIÁTICA E INFORMACIONAL (coñecida como ALFIN). Trátase de que o alumnado desenvolva a competencia en aprender a aprender, porque moito nos din que hai que investigar, que hai buscar na rede, que hai que crear e recrear pero... quen nos ensina a todo iso?

O proxecto da biblio este ano chámase EXPLORANDO OUTES e para guialos elaborei este organizador gráfico que mostra os cinco pasos necesarios para realizar un bo traballo de investigación.


Tamén atopei na rede, grazas ás publicación do equipo de Bibliotecas Ecolares do CAFI, estes materias tan interesantes sobre trucos para as búsquedas en Internet,  parecéronme moi bos para os máis maiores do cole.


Pola miña experiencia, os nenos e nenas non buscan na rede de forma eficiente, son enganados facilmente por publicidade ou sacan a información en páxinas que non entenden ou non son demasiado rigurosas. Esperemos que con axudas como estas se vaian convertindo en persoas adultas críticas e reflexivas que contrasten a información e non se queden co primeiro que atopen. Isto debería ser un traballo gradual que vai dende a educación infantil ensinándolles a buscar unha foto para ilustrar algo (por exemplo), á búsqueda guiada polo adulto nas etapas intermedias, ata as máis altas onde eles sos se deberán enfrentar ao milleiro de información que está hoxe á nosa disposión. E iso, que se escribe tan fácil, aínda o estamos aprendendo os "moi maiores"... ;)

jueves, 7 de enero de 2016

POLO NADAL, COCIÑA CREATIVA

Xa no Samaín, as mestras de AL e PT, fixeron uns obradoiros de cociña creativa onde os nenos e nenas que acuden ás aulas de apoio lles ensinaron a todo o cole como facer unha araña de galletas, crema de castaña, regalices e Lacasitos.
O alumnado da miña clase de terceiro fixeron os cálculos para ver cantas cousas nos facían falta e canto custaban. Finalmente fomos a un súper local a buscar os utensilios e alimentos necesarios. Aquí vos deixo a nosa factura.


Se queredes ver esta actividade podedes visitar a páxina do cole picando AQUÍ. 

No Nadal repetimos a experiencia, esta vez non foi para todo o cole foi so para a nosa clase, fixemos porco espiños de uvas e pera e o Apalpador de queixo cheddar e pan de molde. Escribimos as receitas de cociña, calculamos os gastos, fixemos a lista da compra e traballamos de forma integrada os contidos de diferentes áreas: as linguas (o texto instrutivo), as matemáticas (moedas, operacións e estimacións), as ciencias naturais (pirámide alimentaria), a búsqueda e selección de información e a expresión oral (gravamos os titoriais).


Déixovos aquí algunhas imaxes pero podedes ver os vídeos da actividade picando no enlace do marxe lateral dereito que leva ao blog da nosa aula "A CLASE DOS LISTOS".





As profes de AL e PT, e eu como titora, diseñamos de forma colaborativa estas actividades e esta pretende ser so unha mostra do que se pode facer cando hai traballo en equipo e tamén como se pode promover a inclusión educativa. 
Por explicarvos un pouco como o organizamos dicir que foron elas as que traballaron cos nenos na aula ordinaria (eu estiven facendo formación de usuarios na biblioteca) por iso intercambiamos papeis e puxémonos de acordo. Eu traballei máis a parte das matemáticas e elas as linguas.
 Pon nalgún sitio a lexislación que non se poidan organizar así os apoios? Quen se beneficia deste tipo de actividades? Os nenos e nenas con NEAE ou os compañeiros e compañeiras que ven como cada un pode traballar na medida das súas posibilidades, como facer para axudarse entre outros e como todos e todas podemos ser diferentes e á vez iguais en dereitos? 

 Como vedes foi un fin de trimestre moi culinario!

 Para o Entroido máis! ;)

Feliz ano para todos e todas!


Related Posts Plugin for WordPress, Blogger...